Verse
Bärn
I paar Täg wird i der Schwiz e nöie Bundesrot de gwäut.
Bi der Kandidatelischte üs der Name Pirmin fäut.
Schinbar wott er nid aträtte wäg de Ching und wäg der Frau.
Doch mir wüsse werum är nid wott und säges öich jetz au.
Är wär grad wäg sire Grössi de ganz vore mit derbi,
au isch är e aute Sack und das muesch dörte schliesslech si.
Aber wenns im Summer heiss isch, fäut ihm Zyt id Badi z goh.
Und bi Staatsbsüech müessti är de sini Ching deheime loh.
Füre Märet brüchti är e Bodyguard, ah nei im Fau.
I si Nöchi traut sech niemer, für das het är sini Frau.
Völlig klar isch doch der Grund, i üsere Demokratie,
wäg der Gwauteteilig cha e Bischof haut nid Staatschef si.